Ado surang padusi nan barambuik panjang sadang barusaho mambao bola ka ring lawan. Sarangan dari tim lawan datang batubi-tubi, tapi dek usaho tadi akhianyo masuk juo ka ring lawan nan mambuek padusi babadan tinggi gadang tu tasungkua.
Namo padusi tu Melisa. Melisa gadih rancak nan ado di sakolah tu. Banyak laki-laki nan suko ka Melisa. Salain rancak, inyo ba prestasi di sakolah tu. Apo lai pandai lo bamain basket.
Melisa di bao dek Rido ka tapi lapangan.
"Lai ndak Ba-a Mel?" tanyo Rido ka Melisa.
"Indak ba-a do Rido, sakik saketek jo nyo," kecek Melisa nan sadang diubekan lukonyo dek Rido.
"Mangkonyo kalau main tu elok-elok, maso padusi banyak bakeh luko di badannyo," kecek Rido nan parhatian ka Melisa.
Melisa marunguik mandanga kato Rido yang parhatian ka inyo.
"Kalau Mel banyak luko, tu Rido ndak suko ka Mel lai?", tanyo Melisa ka Rido.
"Indak, Rido cuma maingekan Mel sajo, supayo hati-hati," sambia malakekan palampok luko ka Melisa.
Lah sudah Rido mambantu Melisa maagih ubek ka lukonyo, Melisa balari mandakek i wasit manadoan lago ka dilanjuikan.
Rido tu pacar Melisa. Urangnyo paratian ka Melisa. Walaupun badannyo pendek dari Melisa, tapi indak jadi panghalang cintonyo ka Rido. Banyak laki-laki nan iri ka Rido. Ba-a kok bisa Rido tu jadi pacarnyo Melisa.
Pernah wakatu tu, kawan sakelas jo Melisa, Ari namonyo. Lah babagai caro dilakuan dek Ari. Tapi cintonyo batapuak sabalah tangan. Dek ulah tapadayo rayuan si Ari, Melisa hampia masuak parangkapnyo.
Ba-a ka indak. Ari mampaburuakan Rido. Di muko Melisa nyo manih tapi dibelakang Melisa nyo mangancam. Mangancam Rido untuk mancontohan sagalo pr nan diagiah dek guru kalau masih nio bakawan jo Melisa.
Indak sampai hati Rido ka Melisa. Dituruikan kandak si Ari. Satiok ado pr dari guru, Rido lah maagiah contoh ka Ari sahinggo nilai Ari malonjak naik.
Mulonyo Melisa simpatik mancaliak nilai Ari nan tinggi-tinggi. Bararti Ari lah mulai barubah. Biasonyo nilainyo paliang buruk.
Dek karano Ari lah barubah, Melisa ko picayo. Ado raso bangga Melisa ka Ari. Ari ko mulai mandakekan Melisa.
Ado firasat nan indak lamak tacium dek Melisa. Salamo ko Rido indak pernah indak mangumpuan tugas. Jikok ditanyo dek guru, Rido manjawab tugas tu tingga di rumah karano indak takana mamasuakan ka dalam tas.
Melisa tambah curiga, ba-a kok samo lo kasusnyo jo Ari. Samo-samo indak mangumpuan tugas. Kacurigaan Melisa tajawak dek kawan Melisa nan mangadu kalau tugas Rido tingga di rumah Ari.
Rido maminjaman tugas ka Ari hanyo karano mandapekan nilai rancak. Supayo Melisa simpatik ka Ari. Tabongka sadonyo kalakuan si Ari salamo ko.
Babilang maso baganti. Samanjak itu lah, Melisa mamiliah Rido untuk manjadi pacarnyo. Demi bakawan jo Melisa, Rido rela malakuan parintah si Ari.
Rido talahia dari anak patani lado. Urang gaeknyo bakarajo sabagai patani lado. Satiok pulang sakolah, Rido manolongan apaknyo di ladang. Mulai dari mambibikan lado, mamupuknyo, manyemprot ulek nan ado di lado sampai mamatiak lado nan siap di jua ka pasa.
Kadang-kadang ado guru nan mamasan langsung ka Rido. Ladonyo lamak indak padeh tu tahan lamo lo kalau disimpan di kulkas.
Walaupun Rido sibuk manolongan urang tuonyo, tapi urusan baraja indak pernah tingga. Rido manjadi siswa taladan di sakolah tu. Rido aktif dalam kegiatan OSIS. Mendapek juara umum di sakolahnyo. Dek kagigihan Rido tu lah mambuek melisa jatuh cinto.
Kapintaran dan suko manolong tu la nan mambuek Melisa tagilo-gilo ka Rido. Apo lai Melisa urangnyo santiang lo. Samo-samo pandai dalam baraja.
Indak mamandang randah karajo urang tuo. Walaupun Melisa anak urang kayo nan punyo usaho gadang di kota tu. Tapi Melisa indak piliah-piliah dalam bagau. Anaknyo ramah, elok samo urang, santiang, pandai main basket, suko mambalanjoan kawannyo. Indak heran kalau banyak urang nan kanai hati ka Melisa. (FB)
Komentar
Posting Komentar